Die studieveld van neurowetenskap is ’n interessante verkenning van die menslike brein en senuweestelsel. Dit ondersoek die wyse waarby die brein betrokke is by alles wat ons doen, dink, voel, handel, leer en onthou, asook hoe dit met die liggaam kommunikeer. Neurowetenskaplikes bestudeer die ontwikkeling van die brein, die aanpasbaarheid daarvan en wat gebeur wanneer dinge “verkeerd gaan” as gevolg van veroudering, besering of siekte. Die brein is die menslike liggaam se “beheersentrum” en vorm ons fisiese ervarings en optrede. Is daar egter meer aan verbonde as elektriese en chemiese prikkels? Watter dieper konneksies kan ons menslikheid definieer?
Neurowetenskap het interessante biologiese insigte openbaar in hoe die innige persoonlike praktyk van gebed, geestelike aktiwiteit kan beïnvloed. Alhoewel dit fundamenteel ’n geestelike aktiwiteit is, het gebed meetbare effekte op neurologiese funksies. Studies wat funksionele magnetiese resonansie-skandering gebruik, toon dat gebed, aktiwiteit in die brein se minder belangrike pariëtale lob kan verminder – ’n area wat geassosieer word met die onderskeid tussen self-bewussyn en bewustheid van ander dinge. Tydens gebed word verhoogde aktiwiteit waargeneem in dele van die frontale lob wat aandag en fokus beheer, soortgelyk aan wat gebeur tydens ander take wat intensiewe konsentrasie vereis (“Religion and the Brain,” Psychology Today, 14 Oktober 2019).
Terwyl die wetenskap die fisiese maniere kan bevestig hoe die brein deur praktyke soos gebed baat vind deur ’n sekere gevoel van verligting te bied, fokus te verbeter en ’n gevoel van konneksie te skep, oortref die ware voordele van gebed tot die ware God dit wat wetenskaplik gemeet kan word. Die daad van Christelike gebed is doelgerig en voordelig wanneer dit met toewyding uitgevoer word. Dit help om ’n band en verhouding met die God van die heelal te vestig. Dit dien as ’n middel waardeur ons onderwerping toon aan die Een wat alle mense na Sy beeld en gelykenis geskape het (Génesis 1:26).
Meer as die fisiese menslike brein word tydens gebed geoefen, gekalmeer en geherkalibreer; so ook die gees in die mens, die menslike gees wat God aan almal gee wat na Sy beeld gemaak is (Job 32:8; 1 Korinthiërs 2:11). Daar is geestelike voordele wat voortspruit uit die diepgaande verbinding wat gebed verteenwoordig. Terwyl neurowetenskap nie die gees in die mens kan opspoor nie, verklaar die Bybel – die Goddelike en gesaghebbende openbaring van God aan die mens – die bestaan daarvan as ’n feit. Die gees in die mens werk saam met die menslike brein om die menslike verstand te genereer en te bemagtig en met daardie verstand kan ons met ons Skepper kommunikeer. Daardie kommunikasie vind tydens gebed plaas.
Die faktor van geloof
Hoe bid ’n mens dan ten einde antwoorde te kry? Sulke gebede vereis geloof, nederigheid en ’n duidelike begrip van God se wil. Jesus het in Matthéüs 9:27-30 vir twee blinde mans gesê: “Laat dit vir julle wees volgens julle geloof”. In Matthéüs 21:22, herinner Hy ons later daaraan: “... wat julle in die gebed vra, sal julle ontvang as julle glo.” Hebreërs 11:6 leer ons dat dit God behaag wanneer ons geloof het – egte, lewende geloof wat oorgaan tot dade en opregte gehoorsaamheid (Jakobus 2:20). Sulke geloof is van kardinale belang om antwoorde op ons gebede te ontvang.
Gebed moet ook 'n onderdanige gesindheid wat na God se wil soek weerspieël en nie bloot ons begeertes dikteer nie. Baie mense kry geen antwoorde op hulle gebede nie omdat daardie gebede nie God se begeertes weerspieël nie (Jakobus 4:2-3). Jesus het vir Sy volgelinge ’n modelgebed gegee om te demonstreer hoe belangrik dit is om God te verheerlik, om Sy leiding te soek, sondes te bely en ander mense te vergewe omdat ’n onvergewensgesinde hart ons gebede verhinder, aangesien die vergifnis wat ons aan ander mense bied, ’n voorwaarde vir God is om ons te hoor (Matthéüs 6:5-15).
God verheug hom daarin om gebede te beantwoord en Sy begeerte is om goeie dinge te gee aan diegene wat Hom ywerig soek (Lukas 12:32). Gebed verander ons en so word ons innerlike daagliks vernuwe (2 Korinthiërs 4:16). Deur getrou, nederig en in ooreenstemming met God se wil te bid, maak ons onsself ontvanklik vir Sy leiding en seëninge.
Die apostel Paulus beveel ons om met ’n ingesteldheid van dankbaarheid te wandel en te “Bid sonder ophou” (1 Thessalonicense 5:17-18). Biddende dankbaarheid kweek nederigheid en verdiep ons verhouding met God. Begin vandag nog om die voordele van gebed te beleef – fisies sowel as geestelik – deur met u Skepper te verenig en Sy leiding te vra en u lewe te lei volgens Sy wil.